قَصرُ الإمبراطور: ما أبغا لا ليسن ... ولا أبغى عرس

أنا واحد ما أبغى ليسن .. و بين قوسين ( جان هذي رجفتي .. ما أمبا أعرس ) الي مو فاهمنه أنا ، بترول الكرسيدا مالت السيدة الوالدة خلصته رايح و جاي أو ما ظل محل ما رحت فيه من سلماباد إلى عالي إلى السنابس إلى الدراز إلى السار إلى المنامة، مثلاً شارع المعارض الي هوو شارع المعارض فوق فلاف مرات رايحنه ويا السيد الوالد انجيب غذا من محمد نور .. هذا غير المناحس ويا السيارات الي تطلع عليي و تبغا تتجاوزني و الي مسوي روحي فيها عنتر زماني .. عقب هالحالة كلها .. أركب سيارة الامتحان أتنافض كأني ما ركبت سيارة في حياتي ..

هاليوم أنا بكفر .. هاليوم أنا بلحد .. ويش صار مانا داري .. حتى هالمتتحن اسوي ليي ويش فيها رجولك .. قلت ليه ويش دراني فيها !! لاوي لا شعورياً تتنافض .. مو انا رايح قايل ناجح ناجح .. اذا رسبت دخير بالله في السكنيرات لأن مسوي روحي فهيم وكلا الف بدون ما اضرب سكنير .. و اذا اضعف الايمان اضعف الايمان برتبك و بخطأ خطأ فادح .. يمكن في الدوار لأن طلعتي بتصير أبطأ من الفري غير الي متعود عليه .. مو اجي ادخل تراي .. هاند بريك ما انزل .. الرويس مادري ويش .. المرتفع السيارة تنزل .. و هالمرور المتسبب طايح الحظ يقول طالع على سيارات !! وينا طالعة علي سيارات وانا قادر اطوف .. دودهني وخلاني اخلي التيس يولد .. و الشايب يقمطونه

ولا .. كل شي يهون و يجي ليك محمد عباس حامل قلاص الكوفي .. طاح حظك و طاح حظي فوقك و طاح حظ الي دخل ويايي تراي فوقنا و حظ المدرب فوقهم كلهم .. ويش هالمر .. ويش هالمر .. الي امبا افهمه حق وي ارتجفت .. هذا يقولون ليي عرس مليون بالمئة اصير ليي نفس الافلام .. اتجي خطيبتي عن حساب تقدم ليي العصير اقوم اجبه عليها

صراحتن يعني جان بعد برد ادخل اتراي و برسب انا واحد ما ابغا ليسن .. ما يسوى اتحطم نفسيا و جسديا و شعوريا و عاطفيا و روحانياً على سبة ليسن ورقة خضرة سخيفة لاتودي ولا تجيب .. ولا مستعد ثانياً اقوم اجب العصير على خطيبتي واقعد افشل روحي بين الي يسوا و الي ما يسوى .. اتركوا عنكم ابويي .. خلني جدي بلا ليسن ولا عرس وايد ابرك.

عند التسجيل .. سيصلك خبر كل لون جديد
إني أنا السيـد/ة
صاحب البريد الإلكتروني:
لك من المتابعين أقولك وقف إرسال هالهرار