لذلك يعني أنا أستانس لما أسوق المريول – سيارة أبويي لمن لا يعرفها – خصوصاً يعني و أن البترول مو عليي، أصلاً المفروض يعطوني معاش لأني أوصلهم هني وهناك، المهم شعبنا الكريم صار ليي تقريباً قدر اسبوعين فلافة ما سقت أنا، و المريول تراكشن الله يشافيها كانت مريضة اشوي و اليوم طلعنا فيها نجربها هل استعادت صحتها و عافيتها و عنفوانها أم لا، و بالفعل طلعنا بالمريول وصلنا لرويان الي على خط البديع انا نزلت خلصت شغلي بسرعة ورجعت للمريول خصوصاً انا مشتاق ليها يعني، وكنت قاعد مسترخي ما شاء الله عليي فاتح فتحة السقف منزل الدرايش اشوي و "بيس" إماراتي شغال يا جماعة، وبينما أنا كذلك و إذ بكرولا موديل عشرة ما ظلت خفسة ما فيها واقفة صوبنا، و من فم فتحت الباب وحدة فورة بقرة جنها فزاعة حتى ابليس يخاف منها و صفقته بالمريول!! بالمريول صفقت الباب !! يعني باب سيارتهم صفقته بالبدي مال المريول !! مستوعبين أنتون ؟ .. قليلة الأدب راحت لرجلها العديم الأدب تسوي ليه ضربت هالسيارة على خفيف و جان رجلها يقول امشي امشي ما عليش .. لعنة تلعنك و تلعن مرتك و تكسر ايدها و تكسر سيارتك فوق ما هي مكسرة فوقها يا عديم الأخلاق يا قليل التربية هذا فوق ما تجي اتقول ليي آسف تسوي هالحركة الحقيرة قدامي يا أسفل السافلين

خسارة كنت مشغول أطالع الي طايفة ناسية نص فانيلتها في البيت و مسوية شعرها جنها مايكل جكسون – اطالعها حق انتقدها طبعاً يعني – و بالتالي ما مداني استوعب أمرين في نفس الوقت، بس ويش أسوي يعني حتى لو استوعبت الأمر يعني لو جاهلة نزلت حبيتها على راسها، لو كبيرة حليوة تتمتع بمزايا جمالية يعني شعرها حليو عيونها حليوة نزلت قلت ليها تفداش مو بس الفمانية سلندر حتى الفمانية وعشرين سلندر اصفقي الباب فيه، لو رجال نزلت هاوشته، لكن هادي أكبر من أمي أولاً و و وياها القلص مالها عديم الرجولة ثانياً، يعني إذا هي ما استحت على دمها وهو واطي أنا وش أسوي ؟ على الطاري هو يحسب مرته حليوة يعني إلي ماخذنها ، لا معايير جمال ولا معايير أخلاق عند هالفنين! أفكر أنا وش حالتهم هذلين، و إن شاء الله بحق يوم الحسن لأنهم ما اتحلوا بأخلاق الإسلام من دمار لأدمر

ويش هالمر إنعدمت الأخلاق يعني !! راحت هباءً منثورا .. بس ويش أقول غير اللهم العنها و العن رجلها و كسر مرته و سيارته فوقها زود ماهي مكسرة و ملصقة بعلوج، و خله ياربي من نقل عام لنقل عام يدور يا قادر يا كريم

* سوري الأخوان اللطيفين يعني على هذي الكلمات و المستوى في المقالة، بس ادري بروحي لازم اسوي "جي" علشان اطلع الحرة .. بعدين تستاهل ثانياً محد قال لعديمين الجمال و الأخلاق أن يسوون جدي .. و الجزاء من جنس العمل على فكرة فكرت أنزل أشمخ سيارته من الطول إلى الطول بس بعدين قلت بترفع عن ذلك يعني .. فيحمد ربه أنه جت على جدي يعني ولا تقولون ليي الموضوع ما يستاهل أن أكتبه لأن الي مو عاجبه ما يقراه بالدرجة الأولى كبت هالكلام فش خلللللق