المـادة أليـف – الأشياء إلي أحبها

o     الطيران و المـوستنج و الجيـتار

الجيتـار .. الموسيقى لغة الملائكة ما يحتاج نتحجى بعد

o      الأكل و النوم

الأكل و النوم، أهم مقومات حياة الإنسان عندي، علما أن هالأشياء الفنين ما كنت أطيقهم و أنا صغير يعني .. بس سبحان اللي يغير وما يتغير

النوم و الله مغربلني مغربل يا أخوان .. و الله ويش أقوليكم يعني تخيلوا مفلا لين أروح الحمام كرب السامع لازم ما أشغل الليت لأن إن شغلته طارت النومـة! وخلاص اذبح روحي حق انام ماميش .. و أخ على ماميش لكن لين نمت لو صار فيضان او لو انقطعت الكهربا في عز الصيف و بند الايسي ما أوتعي لأن ما فيه إزعاج لكن لين سمعت شي إزعاج خلاص، نفل رنة المنبه مال التلفون الي تجيني القشعريرة لين أسمعها حتى لو مصحصح حدي، و هني من هذا القصر المبجل العتيد العامر أقدم معلومة تاريخية حق الي ما عندها ذوق وبتاخذني و حق زمبو و وردو، ما بقول لبيتنا لأن ما يعرفون ليي خصوصا و أني كائن يعني رومانسي و رقيق و شفاف و ناعم و أبيض و نفس الحرير أتنرفز حد الموت لين واحد ما قعدني بخفة و مرونة .. يعني تخيل يجي انته نايم يجي ليك واحد على راسك يقول بلعدال " عـلي " الحين الواحد وهو نايم يبغا صوت موسيقي صوت يمشي ويا الهوى و الله صوت ويش فقالته هو بلعدال ما أختلفنا بس الصوت الرجاجيل لو ويش سويت ما يصير ناعم و طبعاً اقول صوت الرجاجيل لأن أختي الفاضلة تتزوبق وما ترضى تدش حجرتي لسبب نبينه لاحقا، و أمي من زود ما هي منشغلة و منهمكة في إعداد أجيال المستقبل كلا القيامة قايمة عندها وبس وهي رجعتها من المدرسة على باب البيت من تقول علي الصوت زلازل عندي وانا منخمد في حجرتي، أنزين قمنا نقفل الباب طلعوا ليك شي أخس يطقطقون الباب .. تقول المهدي طلع !! تحسه بينقبع من محله وهم يقولون ليك الا بلعدال و انته دليع ومادري وي، أنزين عاد أنا من أنزعج أعاند و هذي يتذكرونها خالاتي كسروا الباب كسروا الدريشة هلكوا روحهم تلفونات يمبوني أطلع و أنا أبداً هو صدق يعني الازعاج المنطقع النظير طير النومة من عندي إسبوع لكن بقيت ليي ساعة ساعتين جاعس روحي في هالسـرير فقط عناداً

أما الأكل بعد ما يحتاج، الكل يعرف، عـاد قبل جم ليلة منى – خت أميرة جان ما تعرفونها، و اللي ما يعرف أميرة مشكلته – جاية تقول ليي و أنا بموت من الجوع تقول بتسوي ليها سندويج جبن و خس و طماط و فلفل .. أقوليكم تقول قدامي جدي و أنا بموت من الجوع و محسرتني تحسر على الحيـاة .. عاد بعدين قلت يعني ألحين أنا ينلعب عليي يعني جان أقوم ليكم و اسوي ليي جم سندويجة معتبرة .. عيـل ها .. مع أن لاحظوا وياكم صعب على الإنسان البحراني العازب أن يروح المطبخ و يولع الليت و يسحب ليه صحن و سجين و يطلع الخستة من الجيس و يشيل الطماطية من السلة ويقعد يدابج و يقصص على سندويجة جبن .. يسحب الروتية و السليسة وقوطي البيبسي وهو ماشي ما يطلع من المطبخ ويوصل الحجرة الا هو مخلص مو وي بس أنا تجشمت هذا العناء المرير علشان ما تقول ليي سندويجتك ما فيها خستة و الله ما فيها طماطية أعرفها أنـا .. و طبعاً يوم فاني تجي المعلمة بموالها المعروف شيفا تاخذ السجين ما تغسلها وشيفا تستخدم الصحن ما تغسله وكل ما أشرح ليها إن أنا من يوم إلي يولدوني لليوم ما أغسل ماعون بل وما أغسل أيدي قبل لا آكل وما أشوف روحي ما فيه فايدة، المحاضرة تشتغل يعني تشتغل كل ما نسوي لينا شي ناكله .. أنا أدري محترة على الأيام الخوالي إلي ألحين معقمين المرضعة و ألحين مغسلين القماط في ماي مغلي و ألحين مستخدمين مطهر و ألحين مبدلين مادري وي كأن محد انجاب في العالم ولد جميل و حليو و مسكت غيري .. عاد استلم الويع و الوعي من معشر البنات ألحين لاسيما الآنفتين الذكر .. و الله شوفوا احنا الصبيان عادي عدنا عجبكم عجبكم ما عجبكم انا بخليكم تعنسون من خلال هذه المدونة

و من قصري المسدد و الموفق نحيط منى خت أميرة علماً بأن البارحة شويت ليي فلاف همبرقايات على الفحم بالفلفل و الكاتج أب و الجبن و الطماطم المشوي متبعينها بعدد لا بأس به من قلاصات البيبسي و بغوري من الجاي السنقي المحترم الي خليناه يخدر طول الليل و احنا ملتمين حول الفحم الي تصدر منه رائحة اللحم و الشحم .. وخلي النقت يفيدش الا يسمع دجاجة أحين ماكلة

o     الأفلام

طبعاً الصينمة من أجود أنواع الاختراعات و أحب الأفلام كفيرن كفيرين ومنها أفلام الفضاء و الطائرات و الغواصات و الجريمة المنظمة أحلى فلم شفته في العالم التايتنك شفته مقطع  لا أحد يقعد يسوي ليي سوالف ولا هرار و أكره فلم شفته فلم عن حساب رحلة بالطائرة مستن وياه وحسبالي فلم من النوع الاوكي بعدين طلع كاتب السناريو متـ ... ( الله يغربلك يا الكسيف ) و المنتج حمار

o     البحر

طبعاً البحر شي مهم في حياة كلمن يعيش في بيئة مطلة على البحر، و في فترة من الفترات صار البحر عندي شيء مقدس لازم يوميا اروحه ساعة ساعتين و منها فهمت ليش رجل الخالة رجعته من الشغل في عز البحر يروح يفرش ليه في عرشتهم على البحر و ينام عوضاً عن ما يروح البيت، وصارت هواية من هواياتي ان اروح الليل ابركن صوب العرشة – لأن ما يبين شي في الليل له – و أقعد أتصوخ ويش يقولون بيت أم مرهون و بيت بن خميس و أضحك هع هع

o     البحارنة

يعني لين وقف بحراني يتحجى قدامي أبداً ما أقدر أجود روحي، و أقصد البحارنة البحارنة مو الهرير الي مادري شيفا، و عندي نظرية أن أخفف دم في الخليج هو البحراني و الي مو مصدق يجـرب، ما بزيد في الحجي حق لا يقولون عنصري.

o     السـنابس

أحـد عنده مـانع، و الي في قلبه حرة يفجر عليـه سلندر

و هني انا عندي نظريتين

أما الأولى فهي أن السنابسيين ما تقدر تعيش وياهم ولا تقدر تعيش من دونهم

أما الفانية فهي العرق السنابسي و السنابسي تج و يتضح ذلك جليا جليا لين كان واحد مذكر و واحد مؤنف تسمع الصراخ لوينا ولأنهم فنينهم سنابسيين فنينهم كل واحد أعند من الفاني و محد يرضى ينكسر و قوم فجج عاد

o     البيض و الطماطة

أهـم شي البيض و الطماطة

o     التبسيط ورا المـطار

النظارات الشمسية شي مهم عندي في الحياة .. لكن ما ادري لاوي من يوم ما ولدوني مانا متوفق فيهم يا تضيع يا تنباق يا تطلع مي حليوة يا فيها علـة و خب لأني أبداً مو سفتي و انسان محافظ على الفلوس و مقدر للأولويات و الشي الي يسوى و الي ما يسوى أسعار النظارات الي آخذها بالأحرى السيد حسن ياخذها ليي سبعين وانت صاعد

o      السفر بالسيارة

هو صدق يعني ماخذنها تحصيل حاصل و سكن هاند ومو على ايدي ويوم اكتشف قزوز مقضوض و يوم ربل مشقوق و يوم مادري وي، و رغم ان هي مو بغيتي – لأن بغيتي موستنج – و هذا و ذاك لكن فرختي بعد وي ما أرضى عليها ولا أرضى واحد يتسند عليها أو ياكل فيها أو يجقر فيها أو يتحرك وايد فيها و الي أشوفه يقلل احترامها احرم عليه يركب فرختي ( بعد الله يغربلك يا الكسيف و انتون نظفوا مخوكم ) يَستَقِل فرختي

o     اليـازية محـمد ، و محمد عبده ، و الطرب الروسي و الكنتري سونقس ، ولاشك لا شك الطرب العراقي

هذي اليازية ادري كلكم ما تعرفون ويش تطلع لذلك بقول ليكم هذا انا قاعد ويا جم صبي كنت اشوفهم بموتون قلت ليهم ويش فيكم واحد منهم عطاني تلفوني سمعني اغنية، سمعتها سألتهم الحين انا لو اتقدم ليها – المغنية يعني – تاخذني، اقوليكم بغيت على روحي السلامة كلهم يبونها .. اما الا انتون إشكال شرعي

أبونورة وهل يخفى القمـر !

الروسي محد يعرف ليه الا الي جربه

الكنتري .. داتس وت أي كول ات ميوزك

أما العراقي بعد ما يحتاج اسمع ليك جم موال و أبداً

المـادة بـه – الأشياء الي ما أحبها

o     ما يسمى بالجامعة الأهلية

لعنة عليها و على الي يذكرني فيها

o     العفسـة.

أنا ما أدري لاوي لين أركب سيارة واحد من الصبيان أشوف بيتهم كله داخلها هني دولاغ وهني كتاب و هني صفرية وهني ورقة وهني فوطة و هني مادري وي .. قلنا يعني يكبرون و يعلقون ( بمعنى يعرسون و يعقلون كما شرحنا في تدوينة سابقة ) ركبت في الكامري مالت دوك حسن محل حق تقعد ماميش! وجراح بعد هذا يفتح بطن الواحد يخيطه البنكرياس محل القلب و القلب محل المعدة و المعدة محل المريئ و هكذا .. أما أنا له لا أحب سيارتي عفسة ولا حجرتي عفسة ولا فولدرات كمبيوتري عفسة أحب كلشي في محله ومكانه و بين كل فترة وفترة أطلع الأغراض الي في الأدراج كامل و أرد أعيد ترتيبهم علشان أتأكد أن ما يكون فيه شي مو في محله الصحيح .. بعض الأخوان في تحليلهم لهذه الحالة يقولون ليي شكلك مو صبي ياخوك ... معلوم أنا ملاك في هيئة انسان توكم دارين يعني ؟

o     أحد يدخل حجرتي

كلش مول! و أنا داخلها مقفلة و أنا خارجها هم مقفلة لا خدامة تنظف ولا هـرار ومن جدي قلنا ليكم في بند من البنود السابقة ان اختي تخاف أن تدخل حجرتي لأني ما أحب أقعد إلا فيها و من أحد يقرب صوبها و أنا فيها أقرأه السلام هخخ .. المعلمة تسميها عرشة المعاريس و أكو أدابج جان نمد لينا واير حق التلفزيون مربية الأجيال واقفة حجر عفرة في الطريق جان أحد يتوسط لينا شي

o     الهرار و الفشار

رغم أني أهر يعني، و أحب أن أهر بس ما أحب أحد يهر عليي كلش

o     شي اسمه هوندا و شي اسمه بي أم

o     الدخاتر

وهذا يعني لا دلاعة و لا هرار و لا فشار أكو يوسف مرهون و أبو محمد عباس كل واحد ما شاء الله الله يطول في أعمارهم يقولون ليكم أخس مني، و يعني في ذمتكم هالدخاتر جنهم سوق جدحفص منهو يطيق يروح ليهم، ما أروح سماحتي إلا في الرمق الأخير و السبب كما أسلفنا إلى أن أنا ما أبسط إلا في حجرتي و دائما مقفولة عليي و الاقتراب منها من الأمور المحرمة في الحياة فمحد يدري ابي ردحا من الزمن

o     المورفين

يعني في حالة إن وصلت سوق جدحفص اكره شي عليي يضربوني مورفين ومن تشوف السستر اقول ليها ما ابغاه تفق عيونها فقاً و تروح تهلهل و تكبر للدكتور أكو ما يبغا مورفين كأن معجز صاير أستغر الله ربي

o     خطيبتي الفانية

أكره شي عليي هالعبارة .. أنته زين ما فيك شي بس بنخليك ترقد يوم ويانا احتياط .. اسمع ويش يقول ويانا .. الي يقول ألحين هو باسط ويايي طول الليل يلعب دومنه .. ومو كأني أسهر ليليا أسب و ألعن في تلفزيونهم الي ما يطلع الا البحرين و موشوشة بعد، من هذا المنطلق أنا واحد أسمي دكاترتي بخطيبتي الفانية لأن كل واحد يسوي روحه بموت الحين لين صادني شي و الله شي فبخلوني يوم علشان يرتاح قبلهم و يطمنون عليي المساكين .. أرجوكم!!

o     الأصوات الي ماليها معنى

عندكم مفلا أحين في البرد له، ما فيه إيسيات تشتغل ولا غيره، فجميع أنواع الأصوات في جمجمتي هذا يتعلج هذا يطقطق بمادري وي هذي الشمسية تزن هذا يفرك مادري وي و هذي الأمور تسبب ليي صداع و صراخ في وجه الي يقابلني

o     الثياب

يعني ما تتوقعون أي قد في الحياة ما أطيق الثياب وشلون يعني مبتلش في حياتي انا، معلومة للتاريخ عمري تساطعش سنة و ما رحت اشتري ليي ثياب الا مرة وحدة في التاريخ، الثياب تجيني هني اجربهم في البيت وبعد ما احكم عليهم اروح اسوي شو اخلي من في المنزل يتخذ القرار هل هي زينة لو مو زينة، و يعني لو ما رحت ذيك المرة اليتيمة بعد أشرف ليي ما طلعت الا بفانيلة المعلمة الفاضلة حطت عليها اكس وصار ممنوع الخروج من المنزل ابها، وهو يعني خلصنا هني! ما خلصنا بلوة لباسها الا هذا يركب والا هذا ما يركب و الا هذا واسع و الا هذي مو مكوية و البس و افصخ و البس و افصخ و افلت في الارض ليما تستوي كومة من الجبال، و وانا واحد ما اعرف اجفس الكومة افلتها خارج عرشة المعاريس حتى لو مو ملبوسين علشان ينغسلون ويجون مجفسين لأن انا ما اعرف اجفس قلت ليكم له .. أما صدق البنات مرتاحين

المادة جيم – معلومات شخصية

o     المعاش الأول

هدفي في الحياة أطفش الجهال و أرجعهم لاطمات الصدور شاققات الجيوب و لذلك ما ظل أحد تما حلف أن براوي ولادي نجوم القايلة، ولأن فيه ناس واجد سألوني، أنا واحد لين عرست بعد عمر طويل بجيب توم بنات يعني العودة بسمها زمبو و الفانية زهروا بس بناديها وردوا كيفي عناد و لعانة و الي عنده اعتراض يسجله في ورقة

o     الموقف الأطرف

أنا واحد كنت رايح معرض مدري ندوة لأكاديمية هيرز في الطيران الي كان حلم حياتي أدرس فيها يعني و كانت في فندق الخليج عاد وبينما أنا كذلك أمشي أدور القاعة الي فيها البتاع يعني و إذا بي أرى وفودا تمشي قلت حشرا مع الناس عيد وانا امشي يمين ويسار ما اشوف روحي الا في وسطة محل قدام باب و الكيمرات طاخ قال طاخ قلت انا معجبين بجمالي الرباني يصوروني يعني لو فيه شي ورايي افتريت ورا الا عند الباب داشة وحدة أستغفر الله ربي لابسة فستانا باللون الأبيض طلعت حظي وسط عرس و أنا ما أدري رحت ركيض أسأل السكروتي مصدوما و متروعا إسم الله عليي الا قال لي مش بدليك فتح لي باب الا يقول مش يمين لف يسار مادري وي بتحصل درج انزل بتشوف باب فاني افتحه بتشوف ممر مكتوب صوبه صالة مادري وي هذي هي، اقوليكم و فتحت الباب و إذا به باراً ممتداً ..يعني يكون حل ليي المشكلة سعادته، بس يعني نحب نطمن الأجيال القادمة .. وصلنا في النهاية للمحل المنشود

o     هيابوزا سيارة

اقوليكم شفت هيابوزا حلقتن حلقة و متحمس في يوم الحلقة الأخيرة و اطلع ليكم مريض ذاك اليوم وانام مدة ما احارسها تبدي و تطوف عليي و طايحين الحظ مال التلفزيون من ذاك اليوم ليومكم ما عادوه بغيت اقوليهم يوم اروح التلفزيون ذاك اليوم بس هلكنا دكتور زهير يمشينا بسرعة بسرعة ما مدانا نسوي شي

o     قيس

دام احنا طرينا دكتور زهير مي عدلة ما نسجل هالمعلومة للتاريخ هذا داك اليوم يسألني دكتور زهير أنته مواليد جم قلت ليه 89 قال نفس ولدي قيس يعني سألني شهر جم قلت ليه واحد قال يووووو نفس الشهر يعني عاد انا نسيت شيفا قالها بالعراقي بس بالهمعنى يعني قال لي يوم جم انزين قلت ليه خمسة عشرين ذيك الحزة عاد انقلب السكشن .. صلوات على محمد و آل محمد ، يعني الغرض من هالتدوينة يعني حبيت اقوليكم أن اليوم عيد ميلاد قيس ولد دكتور زهير عقبال ما يخطب ليلى ان شاء الله وبس ..

و هذا إهداء يعني لخمسة و عشرين واحد من الأشياء إلي أحبها وما أحبها وجدي .. بس بعد وي

شحوال